(Midsayap, North
Cotabato/June 4, 2012) ---Nais ngayong ipa-alam ng tanggapan ni North Cotabato
1st District Cong. Jesus Sacdalan na hindi pa nito hawak ang opisyal
na memorandum of agreement o MOA mula sa provincial government kaugnay sa
pagpapatuloy ng medical assistance project sa distrito uno ng lalawigan.
Sa kasalukuyan ay
hinihintay pa ng district office ng opisyal ang MOA na una nang isinumite sa
tanggapan ni North Cotabato Governor Emmlyou Mendoza noong May 16 ng taong
kasalukuyan.
Kinakailangan ang
approval ng pamahalaang panlalawigan na maka-paglaan ng pondo sa Dr. Amado Diaz
Provincial Foundation Hospital upang maipatupad nito ang medical assistance
project mula sa PDAF o Priority Development Assistance Fund ni Cong. Sacdalan.
Ipinaliwanag naman
ni Political Affairs Officer VI Engr. Jerry J. Pieldad na kailangang sundin ang
prosesong ito upang masigurong may maayos na ugnayan ang mga ahensya ng
gobyerno.
Dagdag ng opisyal,
dahil legislative in nature ang trabaho ng mga representante, idadaan dapat sa
ahensya ng pamahalaan ang pondo upang ang ahensya mismo ang mangangasiwa sa
implementasyon ng proyekto.
Sa kasalukuyan ay
ipinapatupad na ng Cotabato Regional Medical Center sa Cotabato City at ng
Southern Philippines Medical Center sa Davao City ang medical assistance
project na pinondohan mula sa PDAF ni Cong. Sacdalan.
Kung matatandaan ay
naglaan na rin ang opisyal ng 200 thousand pesos medical assistance sa Amado
Hospital noong nakaraang taon ngunit sa dami ng mga mamamayan nating kailangang
matulungan ay naubos na ang natukoy na pondo.
Ang Amado Hospital
ay isang primary hospital na pag-aari ng pamahalaan na nakabase sa Midsayap,
North Cotabato. (Roderick R. Bautista)
0 comments:
Mag-post ng isang Komento