P29M Provincial Centennial Pavilion at P24M Provincial Museum bukas na sa publiko

Photo by: Ralph Ryan Rafael

AMAS, Kidapawan City (July 10) – Matapos ang ceremonial blessing ng multi-million Centennial Pavilion at Provincial Museum kahapon sa Provincial Capitol ay pormal na rin itong binuksan sa publiko.

Ang naturang mga gusali ay ang dalawa sa pinakabagong mga structures sa loob ng kapitolyo mula sa savings ng Provincial Government of Cotabato.

Nagkakahalaha ng P29,974,588.70 ang Centennial Pavilion habang abot naman sa P24,353,992.25 ang halaga ng Provincial Museum.

Tatawagin ring “The Basket” ang Centennial Pavilion dahil sa disenyo nito at magsisilbing simbolo ng Lalawigan ng Cotabato bilang food basket ng rehiyon. 

Gagamitin ito sa mga product exhibits at iba pang aktibidad na magpapalago sa ekonomiya ng lalawigan.

Samantala, tatawagin namang Museyo ng Cotabato ang Provincial Museum na naglalayong ipreserba ang kultura at tradisyon ng mga Cotabateño sa loob ng mahigit 100 taon bilang lalawigan.

Dito ilalagak ang mga artifacts bagay-bagay na minana pa mula sa mga ninuno at nagpasa-pasa na sa iba’t-ibang henerasyon tulad ng musical instruments, gamit sa kusina, mga damit, sandata at iba pa.

Sa kanyang mensahe, sinabi ni Gov. Emmylou “Lala” J. Taliño-Mendoza na walang imposible kung nagtutulungan at may iisang direksiyon ang lahat ng opisyal ng lalawigan kasama ang iba’t-ibang sektor.

Sinabi pa ni Gov Taliño-Mendoza na ginagawa ng kanyang administrasyon ang lahat ng makakaya nito upang mapaangat ang antas ng pamumuhay ng mga Cotabateño.

Ito ay sa pamamagitan ng pagpapatupad ng makabuluhan at makatotohanang mga  proyekto na angkop sa pangangailangan ng mamamayan.

Kabilang rito ang mga infrastructures, health, economic, education, tourism, peace and order at maraming iba pang programa na ang layon ay tulungan ang mga mamamayan lalo na ang mga mahihirap.

Pinasalamatan ng gobernadora ang mga sumusuporta sa adbokasiya ng “Serbisyong Totoo” at hinimok ang lahat ng sektor na ipagpatuloy ang pakikipagtulungan at kooperasyon ng bawat isa upang makamit ang tagumpay. (JIMMY STA. CRUZ-PGO Media Center)