Joint meeting ng PDC at PPOC ginanap sa provincial capitol

JIMMY STA. CRUZ

AMAS, Kidapawan City (June 13) – Nagtipon-tipon ang mga miyembro ng Provincial Development Council o PDC at Provincial Peace and Order Council Meeting o PPOC sa joint meeting na ginanap sa rooftop ng Provincial Capitol main building sa Amas, Kidapawan City noong June 12.

Pinangunahan ni Gov. Emmylou “Lala” J. Taliño-Mendoza ang mahalagang pagpupulong kung saan tinalakay ang nangungunang update sa development at peace and order sa lalawigan ng Cotabato.

Nagbigay ng kani-kanilang report ang mga PDC at PPOC members na kinabibilangan ng DILG, DepED, DTI, DENR, DPWH at iba pa sa hanay ng PDC at AFP, PNP at BFP naman at iba pa sa hanay ng PPOC.

Partikular na tinalakay ang naganap na pananalakay ng NPA sa President Rojas municipal station noong May 20, 2014 at ang magkakasunod na bakbakan sa Sitio Nazareth, Barangay Amas, Kidapawan City ngayong linggong ito.

Nagbigay naman ng report ang PNP at AFP sa mga hakbang na kanilang ginagawa upang maprotektahan ang mga sibilyan laban sa pananalakay ng mga armadong grupo at kung ano ang mga aksiyong ginagawa para di na lumala pa ang tensiyon.

Tampok rin sa joint meeting ang pagbibigay ng parangal sa Pres. Rojas PNP dahil sa magiting nitong pagtatanggol sa kanilang station laban sa NPA.

Si PSINP Bernabe T. Rubio at kanyang mga tauhan ang tumanggap ng parangal na iniabot naman ni Board Member Kelly Antao, Chairman ng Peace and Order Committee ng Sangguniang Panlalawigan ng Cotabato.

Pinarangalan din sa meeting ang 4 na mga medalists mula sa Cotabato province sa katatapos lamang na Palarong Pambansa noong Mayo.

Si Cot. Schools Division Superintendent Dr. Omar A. Obas ang nanguna sa pagbibigay ng parangal sa mga kabataan kasama si Gov. Taliño-Mendoza.

Ginawa din ang distribution ng “Timbangan ng Baya” sa bawat munisipyo sa pangunguna ni DTI Provincial Director Engr. Anthony Bravo.

Dumalo sa naturang pulong sina PRO12 Director Sr. Supt. Lester O. Camba, Gen. Alan Arrojado, Commander ng 602^nd Brigade ng Phil. Army at Col. Ronald C. Villanueva, Commander ng 1002^nd Brigade. (JIMMY STA. CRUZ/PGO Media Center)