Written
by: Jimmy Sta. Cruz
AMAS,
Kidapawan City (May
28) – Tulad ng inaasahan, dinagsa ng
libo-libong manood ang pinakahihintay na PBA Legends vs. Cotabato’s Best
exhibition games na ginanap sa provincial capitol gym alas-sais kagabi.
Ayon kay Cotabato 1st District
Board Member at Samahang Basketbolista ng Pilipinas Regional Chairman Loreto
Cabaya, Jr., mahigit limang libo ang nanood sa laro na kinatatampukan ng mga
sikat na Philippine Basketball Association players noong 90’s at early 2000 at
mga piling manlalaro ng Cotabato province.
Ito ay matapos na mapuno ng husto ang
provincial gym at walang naging bakanteng upuan maging sa mga bleachers at sa
inihandang mga upuan sa loob nito.
Alas-kuwatro pa lamang ng hapon ay nagsimula
ng magdatingan ang mga manonood at nagkasunud-sunod na rin ang pagpasok ng mga
sasakyan sa loob ng capitol grounds.
Maayos naman silang pumila at naghanap ng
puwesto upang mapanood ang mga hinahangaang superstars ng PBA at mga pambatong
players ng Cotatabo.
Sampung mga PBA legends ang nakipagsalpukan
sa mga tigasing players ng Cotabato selection.
Ito ay sina Alvin Patrimonio, Kenneth
Duremdes, Paul Alvarez, Rene Hawkins, Gerald Esplana, Zaldy Realubit, Gerry
Codiñera, Rey Evangelista, Adonis Sta. Maria at Bonel Balingit.
Ang Cotabato’s best naman ay binubuo nina
Jayjay Cabañog, Igot Jawod, Losentes, Jun Tamayo, Bimbim Tolentino, Bambam
Calipusan, Henry Gumahob, Jun Cadungog, Marvin Martinez, Mendrano, Ryan Belo,
Eduardo Trinidad, and Kid Abas Letada.
Pagpasok pa lamang ng PBA legends sa
basketball court at Cotabato’s best ay naghiyawan na ang mga fans at di na
magkamayaw sa pagkuha ng litrato.
Pero bago nagsimula ang laro, 13 sa 16 na
official candidates ng Mutya ng North Cotabato 2014 ang ipinakilala sa publiko
at nagsilbing added attraction.
Naging mainit at kapana-panabik ang laro
mula 1st hanggang 4th quarter kung saan lamang ang puntos
ng PBA legends sa lahat ng quarters.
Ang first 5 ng PBA legends ay sina
Patrimonio, Realubit, Esplana, Evangelista at Codiñera. Unang nakapagtala ng puntos si Evangelista sa
pamamagitan ng 3-point shot na pinakawalan nito at siya rin ang highest pointer
sa score na 22.
Ang final score ay 97-76.
Ang PBA legends vs. Cotabato’s best ay isa
sa malalaking sports events kaugnay sa pagdiriwang ng ika-100 taon o centennial
ng Cotabato at Kalivungan Festival ngayong Agosto.
Ito rin ang isa sa mga basketball game sa
kasaysayan ng Cotabato na nakahakot ng mahigit 5 libo katao kung saan walang
naging bakante sa mga upuan.
Nais nina Cot. Governor Emmylou “Lala” J.
Taliño-Mendoza at Vice Gov. Greg “Dodong” Ipong na maging lubos ang kasiyahan
ng mga Cotabateño at patunayang mapayapa ang lalawigan at hindi
nagdadalawang-isip ang mga tanyag na personahe na magtungo sa lalawigan.
0 comments:
Mag-post ng isang Komento