(Kidapawan City/ November 4, 2013) ---Hindi
pa man pormal na nakakaupo bilang konsehal ng barangay Malinan sa Kidapawan
City ang bagong halal na kagawad ay pinabulagta na ito ng di pa nakilalang
suspek noong Sabado.
Kinilala ni Supt. Leo Ajero, Kidapawan City
Police Director ang biktima na si Ronaldo Macrohom, dating kasapi ng Citizens
Armed Forces Geographical Unit Active Auxiliary (CAA) at nahalal bilang
barangay kagawad ng Barangay Malinan sa katatapos na Barangay election.
Sa report, sakay umano sa motorsiklo si Macrohom
kasama ang lulan nitong kinilalang si Efren Pinio ng sundan ng mga gunmen
habang papauwi na sa kanilang bahay.
Sa ulo tinamaan ang konsehal na naging
dahilan ng agara nitong kamatayan habang sugat naman sa iba’t-ibang bahagi ng
kanyang katawan ang tinamo ni Pinio.
Mabilis namang isinugod sa pinakamalapit na
bahay pagamutan si Pinio para mabigyan ng agarang lunas.
Agad namang tumalilis papunta ng President
Roxas-Antipas highway ang mga suspek matapos maisakatuparan ang masamang
balakin.
Narekober sa crime scene ang slugs ng kalibre .45 na
pistol na siya’ng ginamit ng mga suspek sa nasabing pamamaril.
Malaki ang paniniwala ni Ajero na agaw armas
ang isa sa mga anggulong sinusundan ngayon sa pagpatay sa biktima.
Natangay mula sa mga biktima ang Garand
rifle, improvised M14 assault rifle, .38 caliber pistol at isang .45 caliber
pistol. Rhoderick Beñez
0 comments:
Mag-post ng isang Komento