(Update 2) Search and retrieval sa 2 nawawalang pasahero ng lumubog na bangka sa Tamped river magpapatuloy ngayong araw; MDRRMC nangangambang baka patay na ang mga ito

(Kabacan, North Cotabato/September 6, 2012) ---Sumampa na sa lima katao ang namatay sa pagkakalunod ng bangka sa Pulangi river na nasa Sitio PTC, brgy. Tamped, Kabacan, Cotabato alas 5:30 ng umaga kahapon.

Ayon kay Kabacan Incident Quick Response Team Leader Latip Akmad, tatlo sa mga namatay ay na rekober na habang dalawa dito ang hindi pa nakita at hanggang sa mga oras na ito ay missing pa.

Kinilala ng MDRRMC Kabacan na pinamumunuan ni Director Cedric Mantawil ang mga bangkay na narekober na sina: Lilibeth Mandayas 42 residente ng Brgy Libpas, Pres. Roxas, Cotabato; patay rin ng matagpuan ang mag-amang sina Bobong Marabe, 43 at ang anak nitong si Bobs Marabe, 9 residente ng New Village, Poblacion, Carmen, Cotabato.

Habang missing at patuloy na pinaghahanap naman sina; Maryjane Abarca, 24 residente ng brgy. Simbuhay, Kabacan; Geneve Saliling, 9, grade 3 pupil at residente ng Tamped, pamangkin ni kapitan Daniel Saliling.

Samantala narito naman ang mga pangalan ng mga nakaligtas sa nasabing trahedya: Sa mga estudyante;

1. Sofia Panambolan, 11
2. Christine Porcadilla, 11
3. Mikki Gomata, 12
4. Danica Panigel, 10
5. Dante Mandadtem, 9
6. Nathaniel Maninggola, 9
7. Jonamae Buenafe, 11
8. Jenecel Tomas, 11
9. Jenny Ambag, 12

Narito naman ang mga pangalan ng mga gurong survivors:

10. Jenny-Vi Amella
11. Elvira Sepe
12. Ebma Escobar
13. Edu Salipungan, 46

Kinilala naman ang pumpboat owner at operator na si Norodin Edu.

Bandang alas 6:00 na ng gabi kahapon ng pansamantala munang pinatigil ang search and Retrieval operations dahil sa madilim na ang paligid, ayon kay Latip.

Ngayong araw, itutuloy ang paggalugad sa pulangi river para Makita ang dalawang mga bangkay na nawawala.

Agad namang nagpadala ng rescue team si Cotabato Governor Emmylou “Lala” Taliño Mendoza upang madaling maisalba at mahanap ang mga missing.

Nanguna sa paggalugad sa ilog ng Pulangi ang pinagsanib na operasyon ng Kabacan Municipal Disaster Risk Reduction-Kabacan incident Quick Response Team, Cotabato-PDRRM, Provincial Rescue Team, Barangay Disaster Risk Reduction ng Tamped at Brgy. Rescue Volunteers, Kabacan PNP at Cotabato PNP.

Samantala, sinabi naman ni Rescue Team Latip Akmad na dinala na ang tatlong mga bangkay sa Villa Funeral sa bayan ng Carmen.

Sinabi naman ni MSWD officer Susan Macalipat na nagbigay na ng tulong ang LGU Kabacan sa mga survivors ng nasabing insidente.

Ayon kay Macalipat, Posibleng isailalim ngayong araw sa debriefing ang mga nakaligtas sa trahedya matapos na ma-trauma ang mga ito, ayon sa report ni Tamped Brgy kapitan Daniel Saliling.

Kahapon tinungo na rin nina Dr. Sofronio Edu kasama ang mga Nurse na volunteer ang lugar upang i-assist ang kondisyon ng mga biktima sa pagkakalunod ng Bangka.

Kung matatandaan, tumaob ang bangkang sinasakyan ng mahigit sa 15 katao habang naglalayag sa Pulangi river alas 5:30 kahapon ng umaga sa bahagi ng Sitio Philippine Timber Corporation, Brgy Tamped, Kabacan, Cotabato.

Ayon sa report ng MDRRMC Kabacan na pinamumunuan ni Dr. Cedric Mantawil lulan umano ang nasabing Bangka ng mga 18-20 katao karamihan mga estudyante ng Tamped Elementary School na lalahok sana sa District Math Olympics ng USM Annex ng malunod.

Sinabi ni Kabacan Incident Quick Response Team Leader Latip Akmad, may isa umanong pumpboat na malaki ang nag-overtake sa Bangka na sinasakyan ng mga estudyante at guro kaya lumikha ng malaking alon.

Dahil dito, napasok ng tubig ang unahang bahagi ng Bangka dahilan kung bakit ito nalunod.

Dagdag pa sa report, na overloaded ang nasabing sasakyang pantubig dahil sa mga karga nitong siyam na sakong uling, 2 sakong mais at isang alagang kambing sakay pa ang pasahero nitong mga tao.

Agad namang nagpadala ng pumpboat si Cotabato Governor Emmylou “Lala” Taliño Mendoza para tulong sa pag-rescue sa mga biktima. (Rhoderick Beñez)