Dahilan kung bakit pinuputol ang ilang mga puno ng kahoy sa loob ng USM Main campus; ipinaliwanag

(USM, Kabacan, North Cotabato/September 4, 2012) ---Nilinaw ngayon ng pamunuan ng University of Southern Mindanao o USM na may kaukulang permit ang pamumutol ng kahoy sa loob ng USM Main campus, batay sa papeles na pinanghahawakan ni Business Development Center Director Ariel Garcia buhat sa DENR na nakabase sa Midsayap.

Naging kontrobersiyal ang pamumutol ng kahoy sa loob ng campus, ito dahil sa nirereklamo ng ilan ang nararamdamang init.

Paliwanag ng opisyal, na napakadilim ng loob ng campus ng USM noon ng di pa nila pinutol ang sanga ng mga puno ng kahoy.

Inihalimbawa pa nito na palaging nananakawan ng mga gamit ang mga estudyanteng nagsasagawa ng kanilang aktibidad sa Amphitheater dahil sa mga punong kahoy sila nagtatago.

Ang ilang mga kahoy ay matanda na kaya delikado para sa mga dumadaang mga estudyante na mabagsakan ng mga malalaking sanga nito.

Kaugnay nito, inihalimbawa naman ni Director Orlando Forro ang Presidente ng Koltoda na nabagsakan ng puno ng kahoy habang binabaybay ang kalsada sa harap ng College of Education dahilan kung bakit nila ipinupursige ang pagputol ng mga sanga ng kahoy.

Nilinaw naman ng opisyal na ginagamit nila ang lumber ng mga kahoy sa mga itinatayong imprastraktura sa loob ng USM na bagay namang nakakabawas ng gastusin sa pagbili ng kahoy.

Sa kabila ng pamumutol ng kahoy, sinabi naman ni College of Agriculture Dean Dr. Adeflor Garcia na may hakbang na silang ginagawa, ito ay ang pagtatanim ng Oil Palm na siyang mitigating measures, kontra climate change.

Maging si IMEAS Dean Dr. Abubakar Murray ay kinatigan din ang pagpuputol ng kahoy papunta sa kanilang Institute, ito dahil hindi maglalagay ng upgrade na linya ang Cotelco kapag nakahambalang ang mga sanga ng kahoy papunta sa nasabing gusali.

Maliban dito, samu’t-saring mga kontrobersiya at concerns ang ipinaabot ng ilan sa Pangulo, kabilang na dito ang isyu sa lupa ng USM at maging ang re-appointment ng Pangulo.

Una dito, nagbigay naman ng kanya-kanyang mga updates ang bawat deans at directors ng bawat unit ng pamantasan, kungsaan sinabi ni College of Agriculture Dean Dr. Adeflor Garcia na muling nakuha ng kolehiyo ang Center of Excellence o COE makaraang matanggal ito sa CA noong 2008. (Rhoderick Beñez)