Contingent ng Midsayap, kampeon sa Street Dancing ng Kalivungan Festival 2012

(Amas, Kidapawan City/September 3, 2012) ---Naiuwi ng grupong Sagsak ng Lunayan, Midsayap, North Cotabato ang kampeonato sa Showdown at Streetdancing competition na isa sa mga highlight ng Culmination program ng Kalivungan Festival 2012 at 98^th Founding anniversary ng probinsiya ng North Cotabato.

First Runner up naman ditto ang tribung  Maguindanao ng Malamote, Kabacan, kungsaan naging makulay ang presentasyon ng mga ito makaraang itinampok ng mga ito ang kakaibang sayaw at pananamit ng tribung Maguindanaoan.

2^nd Runner up naman dito ang contingent ng bayan ng Carmen na tumanggap ng P50,000.00 habang P100,000.00 naman ang tinanggap ng bayan ng Kabacan at P150,000.00 ang naiuwi ng kampeon mula sa bayan ng Midsayap.

Matapos ang nasabing kompetisyon dinagsa naman ng mga mamamayan ng Cotabato ang Kumbira sa Kapitolyo kungsaan sa halagang sampung piso ay tiyak na busog kana dahil may ulam at kanin kana may libre pang mineral water.

Pinangunahan ni Cotabato Gov. Emmylou “Lala” Taliño Mendoza ang nasabing selebrasyon kasama si Vice Governor Gregorio Ipong kasama na ang mga Sangguniang Panlalawigan members.

Dumalo din sa nasabing selebrasyon si second district Representative Nancy Catamco.

Samantala naging pangunahing tagapagsalita at bisita sa 98^th Founding Anniversary ng Cotabato Province si Technical Education and Skills Development Authority (TESDA) Director General Emmanuel Joel Villanueva.

Kaugnay nito, sinabi naman ng pulisya na naging matahimik at mapayapa sa kabuuan ang buong linggong pagdiriwang ng selebrasyon ng ika-98 pagkakatatag ng probinsiya ng Cotabato. (Rhoderick Beñez)