Mga kawani ng NIA-12 magtatanim ng 1000 fruit- bearing trees ngayong Hunyo

(Midsayap, North Cotabato/ May 16, 2013) ---Bilang pakikiisa sa pagdiriwang ng Irrigation Week at ika-50 anibersaryo ng National Irrigation Administration o NIA ay magtatanim ng abot sa isanlibong fruit-bearing trees ang mga kawani ng NIA-12.

Gagawin ang simultaneous tree growing activity sa darating na a-7 ng Hunyo ng kasalukuyang taon.

Kaugnay nito ay nagpadala na ng sulat si NIA-12 Acting Regional Manager Engr. Mario Sande na humihiling sa tanggapan ni Rep. Jesus Sacdalan na mabahagian ng mga pananim.

Umaasa ang NIA na magiging positibo ang aksyon ni Rep. Sacdalan dahil isa ito sa mga nagsusulong ng seedlings distribution at tree growing initiatives sa distrito uno.

Kasama sa malawakang pagtatanim ng punongkahoy ang Libungan River Irrigation System o LibRIS partikular ang mga kasapi ng Midsayap-Pigcawayan-Libungan-Kabuntalan o MPLK Federation of Irrigators Associations.

Nabatid na aakyatin ng NIA 12 personnel at mga irrigators ang kabundukan ng Alamada upang doon itanim ang semilya ng fruit-bearing trees.

Kung matatandaan, taong 2011 nang simulang ilunsad ng MPLK ang Sagip-Tubig, Tubig ay Buhay movement na naglalayong taniman ng punongkahoy ang erya na nasasakop ng Alamada-Libungan watershed at bilang pagsuporta na rin sa National Greening Program ng pamahalaan. (Rhoderick Bautista)