(Kabacan, North Cotabato/ May 15, 2013) ---Patay ang
pitong buwang gulang na babae habang sugatan ang kanyang ina nang masabugan ng
granada habang natutulog sa loob ng bahay nila sa may Malvar St., ng Poblacion,
Kabacan, partikular sa likod ng Anulao Hospital alas-2:45 ng madaling araw
kanina.
Kinilala ni Supt. Leo Ajero, hepe ng Kabacan PNP, ang
nasawi na si Chelzy Jaye Eliarda, habang ang sugatan ay ang ina ng bata na si
Suhaina, 33. Sa ulo ang tama ni Chelzy na agad niya’ng ikinamatay,
habang sa kanang balikat ang sugat na tinamo ni Suhaina Buisan Eliarda.
Ayon kay Suhaina, natutulog sila’ng mag-ina, kasama ang
isa pa niya’ng anak na lalaki nang gulantangin ng malakas na pagsabog. Agad
niya’ng pinuntahan ang crib ng kanyang anak pero laking gulat niya nang
makitang duguan ito.
Di na raw ito gumagalaw at patay na nang ihatid sa
pinakamalapit na ospital.
Blangko si Suhaina kung sino ang posibleng
nasa likod ng pagpapasabog. Wala raw sila’ng kalaban at mas lalo’ng
hindi sila nasangkot sa pulitika.
Ito ang naging pahayag ng mga biktima
sa pahayag ni Supt. Ajero sa panayam sa kanyan ng DXVL News.
Una nang lumabas sa imbestigasyon ng Kabacan PNP na
posibleng may kinalaman sa katatapos na halalan sa bayan ang mga pagsabog.
Ang grenade blast sa Malvar St., nito’ng Miyerkules ay
pangatlo na sa bayan ng Kabacan, simula noong Linggo. Bandang alas-11:30 ng
gabi noong Linggo, isang Granada ang pinasabog sa harap ng Kabacan Central
Pilot Elementary School, isa sa pinakamalaking voting centers sa Poblacion ng
Kabacan. Sinundan ito ng isa pang pagsabog, bandang alas-4 ng umaga,
noong Lunes, tatlong oras bago magbukas ang mga presinto, sa mismo ring
eskwelahan. (Rhoderick Beñez)
0 comments:
Mag-post ng isang Komento