Carmen, North Cotabato sentro ng lindol

(Kidapawan City/ April 18, 2013) ---Nasa bayan ng Carmen, North cotabato ang sentro ng nangyaring lindol alas 5:51 ng hapon kahapon.  

                                            

Ito ayon kay Engr. Milo Tabigue ng Phivolcs Kidapawan sa panayam ng DXVL Radyo ng Bayan ngayong umaga.         

                                                                            

Sinabi ng opisyal na batay sa pinakahuling bulletin ng kanilang opisina, nakapagtala sila ng 5.3 magnitude na lindol at may lalim na 9 kilometers at tectonic in origin.  

                                                                                                                                       

Dahil sa lakas ng mga pagyanig may mga iniulat na nabasag na mga babasaging paninda sa isang malaking establisiemento sa Kabacan, may mga nabasag din mga gamit sa USM administration building.           

                                                                                  

Wala namang may nasawi o nasaktan sa nangyaring pagyanig na naramdaman din sa Kidapawan City, Matalam; Pagalungan, Maguindanao at ilang bahagi ng Davao.        

    

Ilang mga residente ng Kabacan kahapon ang nagulat sa malakas na pagyanig ng lindol.  

                                                                                                                                

Matatandaan na 2007 may malakas din na lindol ang yumanig sa bayan ng Makilala, ayon kay Tabigue. (Rhoderick Beñez)