(Update) .45 na pistola ginamit sa pagbaril sa Vice Mayor ng Kabacan, North Cotabato

(Kabacan, North Cotabato/ January 11, 2013) ---Isang tama ng kalibre 45 pistola ang tumapos sa buhay ni Kabacan vice mayor Policronio Dulay ngayong hapon lamang sa kacan, Cotabato.

Naganap ang pamamaril sa harap ng Allan’s bookstore na nasa USM Avenue. Sa panayam ng DXVL sa mga trabahante ng naturang tindahan, nabatid na bumili ng kandila ang vice-mayor dakong alas-tres ngayong hapon.

At paglabas nito ng tindahan at papasakay na sana sa kanyang zusuki scooter na may plakang 8028 ON nang barilin ng suspek.

Isang bala ang tumama sa kanang tagiliran ng biktima habang may isang pang balang hindi pumutok ang narekober ng mga otoridad.

Bulagta si vice-mayor sa mismong tabi ng kaniyang motorsiklo na kung pagbabatayan ay papasakay pa lamang ito.

Sa ngayon ay nasa lugar pa rin ang mga operatiba ng Scene of the Crime Operatives para sa malalimang imbestigasyon.

Hindi pa malinaw sa ngayon kung may kinalaman sa pulitika ang pagbaril-patay kay Vice Mayor Dulay lalo pa’t papalapit ang halalan ngayong buwan ng Mayo.

Ilang beses na umanong pinayuhan ng mga kasamahan nito sa Sangguniang bayan ng Kabacan si Vice-mayor Dulay na kumuha ng security escorts nito para sa kaniyang seguridad subalit tumanggi ito.

Ayon kay Kagawad Reyman Saldivar, sa tuwing napag-uusapan ang naturang bagay, tanging sagot lamang ng pinaslang na opisyal ay hindi nito kailangan sapagkat wala naman umano siyang kalaban o kahit na anumang banta sa kanyang buhay.

Samantala, dinala rin kanina ang bangkay ni Vice-mayor Pol Dulay sa Kabacan Medical Specialist at doon at idineklara itong dead on arrival. Sa panayam ng DXVL FM news kanina kay Police officer Jubernadin Panes, tanging mga doctor lamang kasi ang makakapagdeklara kung patay na ang biktima bagama’t sa sitwasyong kanilang inabutan sa crime scene kanina ay dead on the spot ito.

Nang matanong ng NEWS team kung bakit natagalan ang pagdadala ng katawan ng biktima sa ospital, ipinaliwanag ng opisyal na kagustuhan ng isa sa mga kaanak nito na huwag munang gagalawin ang katawan nito.

Nasa kaalaman na rin ni Kabacan Mayor George Tan ang pangyayari na ngayo’y kasalukuyang nasa Maynila para sa isang mahalagang lakad. Namataan din kanina ng DXVL News Team sa ospital ang maybahay nitong si former Kabacan Mayor Luz Tan na agad nakiramay sa pamilya ng pinaslang na opisyal. (Allan Guleng Dalo)