(Tulunan, North Cotabato/ June 25, 2013) ---Aminado
ngayon si Cotabato Gov. Emmylou “Lala” Taliño Mendoza na maibabalik na sa
normal na sitwasyon ang kalagayan ng mga residente sa Brgy. Maybula, Tulunan,
Cotabato matapos ang deployment ng Task Force Barko-barko kahapon.
Pinangunahan ng opisyal ang Send Off
Ceremony kasama ang Regional Joint Peace and Security Coordinating Committee
XII, GPH-CCCH, sundalo, pulisya at ilang mga pulitiko.
Nabatid na halos isang buwan din umanong
nagsilikas ang daan-daang mga sibilyan mula sa sitio Barko-barko na sakop ng
brgy. Maybula matapos na muling sumiklab ang sagupaan ng grupo ng MILF at
pangkat ng mga magsasakang armado na layon lamang ay protektahan ang kanilang
mga pananim at alagang hayop sa lugar.
Ang pinag-ugatan ng girian ay isinisi kasi
ng gobernadora sa ilang ahensiya ng gobyerno, ito makaraang mag-isyu ng Certificates
of Land Ownership Awards (CLOAs) ang Department of Agrarian Reform o DAR sa
tatlong lalawigan na umaangkin sa nasabing lugar.
Ito ang tri-boundaries ng
Maguindanao, North Cotabato, at Sultan Kudarat.
Umaasa naman ang mga mamamayan sa
lugar na sa pamamagitan ng JTF Barko-barko ay kung di man tuluyang matuldukan
ay maibsan ang tensiyon habang inilalatag ang pangmatagalang solusyon sa
nasabing problema.
Kaugnay nito, sa kanyang mensahe,
sinabi ni B/Gen Cesar Sedillo na ipinauubuya na ngayon ng pamahalaan sa DOJ ang
nasabing problema.
Tinukoy pa nito na ang land
conflict ay seryosong usapin na dapat ay idsaan sa proseso.
Bilang chairman ng CCCH, sinabi
nitong ang pagpasok ng militar sa inaangking teritoryo ng MILF ay di dapat
bigyan ng malisya, ito dahil ang JTF ay magbabantay lamang sa lugar at walang
kinakampihan. (Rhoderick Beñez)
0 comments:
Mag-post ng isang Komento