Biktima sa panibagong pagsabog sa Kabacan, binawian na ng buhay

(Kabacan, North Cotabato/ June 26, 2013) ---Hindi na nakaligtas sa karit ni kamatayan ang biktima ng panibagong pagsabog ng Improvise Explosive Device o IED noong Sabado ng gabi.

Sa report ng Kabacan PNP binawian na ng buhay ang biktimang kinilalang si Ali Manisi, nasa tamang edad, residente ng Patadon, Kidapawan City.

Dinala umano si Manisi ng isang tricycle driver na kinilalang si Abdulbayan Usop Guiama ng Sitio Liton, Brgy, Kayaga ng bayang ito sa USM hospital matapos na masabugan ang biktima.

Nagtamo ng malubhang sugat ang biktima kaya agad na inilipat sa Regional Hospital sa Cotabato City.

Pero matapos makipaglaban kay kamatayan ay binawian na rin ito ng buhay.

Wala pang na-establish na motibo ang mga pulisya sa panibagong pagsabog ng 81mm sa harap ng Laira Marketing na nasa National Highway, Poblacion kungsaan itinanim ang IED sa drainage na papunta ng Sinamar 2.

Sa ngayon, naka-impound sa Kabacan PNP ang tricycle na Yamaha STX na may license plate 1649 QM na ginamit sa pagdala sa ospital sa biktima.

Inaalamam pa ng pulisya kung ang biktima ay may kinalaman sa nasabing insedente ng pagsabog habang nagpapatuloy ang imbestigasyon. (Rhoderick Beñez)