(Update) Evacuation, ipinag-utos sa mga residente na malapit sa karagatan ng Visayas at Mindanao kasunod ng Magnitude 7.7 na lindol

(Kabacan, North Cotabato/August 31, 2012) ---Niyanig ng malakas na lindol ang ilang bahagi ng bansa ngayong gabi lamang.

Ayon sa Philippine Institute of Volcanology and Seismology (Phivolcs), magnitude 7.7 ang yumanig sa karagatang Pasipiko.

Naitala ang epicenter ng lindol sa layong 112 kilometro timog-silangan ng Guiuan,Eastern Samar.

Kaugnay nito, agad na iniutos ngayon ng (Phivolcs) ang paglikas ng mga residenteng malapit sa karagatan, sa mga lalawigan sa Mindanao at Visayas na posibleng magkaroon ng tsunami.

Ito ay kasunod ng magnitude 7.9 na lindol na yumanig sa Guiuan, Eastern Samar ngayong gabi.

Bagama't ayon sa Phivolcs, nasa magnitude 7.7 lamang ang kanilang naitala kung saan ang sentro ay naitala sa 122 kilomtero timog-silangan ng Guiuan.

Ayon naman sa USGS may lalim na 34.9 kilometro ang pinagmulan ng lindol.

Ayon sa Phivolcs, kailangang lumikas ang mga residente na malapit sa karagatan sa Northern Samar, Eastern Samar, Samar, Leyte, Southern Leyte, Surigado del Norte at Surigao del Sur.

Nabatid mula sa Phivolcs na posibleng umabot ng dalawang metro ang taas ng alon na maaring idulot ng pagyanig.

Itinaas ng Phivolcs ang tsunami alert level 3 sa mga apektadong lugar. 

Naramdaman din ang lindol hanggang sa Kalibo, Leyte, Surigao, Samar, Tacloban City, Iloilo, Legazpi at Cagayan Valley.

Maging sa ilang bahagi ng Mindanao ay may mga pagyanig ding nararamdaman kabilang na dito sa Kabacan, Kidapawan city, Makilala, Davao.

Sa kasalukuyan wala ng suplay ng koryente ang ilang bahagi ng Tacloban.