(Midsayap, North Cotabato/August 28, 2012) ---Matatagpuan
sa municipal gym ng Midsayap ang nakamamanghang replika ng natatanging spring
falls sa Pilipinas- ang Asik- asik.
Opisyal itong nakita ng publiko noong Linggo, August 27,
na itinaon sa playsuit competition segment ng 2012 Search for Mutya ng North
Cotabato.
Nang matapos ang nasabing beauty pageant, hindi
magkamayaw ang publiko sa pagpapakuha ng litrato sa replika ng Asik- asik
falls.
Ayon kay Mark Calapis na siyang nagdisenyo ng replika,
abot sa higit pitumpong sako ng semento ang ginamit upang magaya at magawa ang
isang bahagi ng Asik-asik falls.
Naglagay rin ng dalawang water pumps at mga piraso ng
tubo sa likurang bahagi ng replika upang magkaroon ng artipisyal na daluyan ng
tubig na lalabas mula sa mga batong gawa sa semento.
Matatagpuan ang totoong Asik- Asik Spring falls sa Sitio
Dulao, Barangay Dado sa bayan ng Alamada.
Matatandaang ipinapatupad ngayon ng pamahalaan ang
preventive closure sa pagtungo sa Asik- asik dahil kasalukuyang ginagawa ang
rehabilitasyon ng kalsada sa lugar.
Nabatid din na muling bubuksan sa publiko ang pagbisita
dito ngayong darating na September 1.(Roderick Bautista)
0 comments:
Mag-post ng isang Komento