Isang libu lang ang ibinayad sa pagtumba sa dating MPDC Officer ng Datu Montawal; Vice Mayor ng Datu Montawal, itinanggi naman na siya ng responsable sa nasabing krimen

(Datu Montawal, Maguindanao/August 2, 2012) ---Itinuturong mastermind sa pagpatay sa municipal planning and development officer ng Datu Montawal, Maguindanao ang isa sa mataas na opisyal ng naturang bayan na si Vice-Mayor Muhalidin Bao.

         

Ibinatay ang report sa naging testimonya ng self-confessed killer na si Anwar Dagem na hawak na ng Kabacan PNP noon pang nakaraang buwan.

         

Sa sinumpaang salaysay ni Dagem, sinabi niya na si Vice-Mayor Bao ang kumontrata sa isang nagngangalang Meno at Ali Toto – mga pangunahing suspect sa pagbaril at pagpatay sa MPDO na si Engineer Ronald Bantiding noong June 13.

         

Si Meno, ayon kay Dagem, ang kumontrata sa kanya na may tatrabahuin sila.

         

Si Dagem nagsilbing ‘lookout’ para bantayan ang pagdating ni Bantiding sa highway.            

Pero ang bumaril at tumapos sa buhay ni Bantiding ay sina Meno at Ali Toto.

         

Si Vice-Mayor Bao ang umaano nag-abot ng bayad kay Meno. Isang libo lang ang tinanggap niya’ng bayad. Nahuli si Dagem noong mga huling linggo ng Hunyo. Dito niya ikinanta ang kaugnayan niya sa naturang krimen.

PERO TODO-TANGGI si Vice-Mayor Bao sa alegasyon. Di raw niya kilala si Dagem.

Wala rin daw dahilan para patahimikin si Bantiding dahil itinuring na niya’ng kamag-anak ito.

Paniwala niya, maagang pamumulitika ito.