Mahigit 20 proposed ordinances sabay-sabay na isinumite ng isang konsehal sa Sangguniang Panglungsod ng Kidapawan
DI MAGKANDAUGAGA sa pagtanggap ng napakaraming kopya ng mga proposed ordinance mula sa konsehal na si Jivy Roe Bombeo ang secretary at staff ng Sangguniang Panglungsod ng Kidapawan city.
Bandang alas-330 ng hapon, kamakalawa, isinumite ng first termer na konsehal na si Bombeo ang mga kopya ng 26 na mga proposed ordinance na kanyang inakda sa secretary ng Sanggunian na si Nimfa Initan.
Kauna-unahan raw ito sa kasaysayan ng Sangguniang Panglungsod, ayon kay Initan.
SI INITAN ay nagtrabaho na sa Sanggunian noon pang dekada ’90 at sinabi niya’ng kahapon lang siya nakatanggap ng gano’n karaming proposal mula sa nag-iisang konsehal.
Kabilang sa mga proposal na isinumite ni Bombeo ang patungkol sa pagbabawal sa paggamit ng mobile phone kapag nagda-drive; ang pagpapataw ng matinding parusa sa mga prank callers; pagbabawal sa illegal connection ng cable; paghihigpit ng mga batas kontra child labor sa lungsod; at iba pa.
Iminungkahi rin ni Bombeo, sa pamamagitan ng isang legislative measure, ang pagbubuo ng labor-management cooperation council sa lungsod.
Layon ng naturang ordinansa na matiyak na protektado ang karapatan, interes, at kagalingan ng mga manggagawa sa lungsod.
Sa press conference, sinabi ni Bombeo na ang mga proposal ibinatay niya sa isinagawa niya’ng serye ng konsultasyon sa kanyang mga constituent, simula nang siya ay maupo bilang miyembro ng Sanggunian noong Mayo ng isang taon.
Si Bombeo ang itinalaga bilang chairman ng SP Committee on Education.
0 comments:
Mag-post ng isang Komento