DXVL 94.9 KOOL FM

Bayan ng Kabacan hindi napabilang sa mga benepisyaryo ng 4Ps ayon kay MSWD Officer Macalipat

 

Hindi kasama ang bayan ng Kabacan sa programang 4Ps o Pantawid Pamilyang Pilipino Program ng administrasyong Aaquino, ito ang pahayag ni Municipal Social Welfare Development Officer Susan Macalipat matapos makatanggap ng maraming tanong hinggil sa programa.

 

Aniya, nakabatay umano ang di-pagkakasali ng Kabacan sa isinagawang survey ng mga tinatawag na ‘enumerators’ na nagdedetermina kung sino-sinong pamilya ang makatatanggap ng benepisyo mula sa 4Ps.

 

Samantala, labis naman na ikinagulat ni Macalipat ang napapabalitang may mga tao umanong naniningil sa mga taga-Kabacan partikular na riyan sa palengke na gagamitin umano para sa 4Ps.

 

Pagdadahilan umano ng mga naniningil na sa pamamagitan ng bawat isandaang piso ay makaaaasa umano silang magiging kabahagi ng nasabing programa.

 

Mariin itong pinabulaanan ni Macalipat sapagkat hindi nga raw kabilang ang Kabacan bilang isa sa mga benepisyaryo ng 4Ps. Aniya, mga manloloko umano ang mga naniningil na ito na sinasamantala ang kainitan ng programang ito ng gobyerno. (LMSalvo)