2 bangkay ng salvage victim sa Makilala, North Cotabato; natagpuan

(Makilala, North Cotabato/ February 17, 2014) ---Hindi pa rin tukoy ang pagkakakilanlan ng dalawang mga bangkay na pinaniniwalaang biktima ng summary execution na natagpuan sa Barangay  Old Bulatukan Makilala North Cotabato noong Sabado ng medaling araw.

Ayon sa report kahapon, wala pa rin umanong pamilyang nag-claim sa nasabingmga bangkay.

Ang mga biktima ay may edad mula 17 hanggang 20 at may taas na 5’3 at 5’4 ,ang isa ay nakasuot ng pulang short at  blue na t-shirt habang ang isa naman ay nakasuot ng yellow at red na short at naka long sleeve.

Pawang nakatali ang mga kamay at paa ng mga biktima at binusalan ng packing tape ang mga bibig nito at piniringan ang mga mata.

Ito ay mga palatandaan na sila ay biktima umano ng summary execution.

Nagtamo rin ng maraming tama ng baril mula sa 9mm pistol ang dalawa sa ibat’ ibang parte ng kanilang katawan at naging dahilang ng agaran nilang kamatayan.

Posibleng sa barangay Old Bulatukan pinaslang ang dalawa dahil sa mga narecover na mga bala at live ammunitions sa crime scene.

Sa ngayon patuloy ang panawagan ng PNP na kung sino man ang nawawalan ng miyembro ng kanilang pamilya ay pumunta lamang sa Collado Funeral Home sa Kidapawan City dahil doon pansamatala inilagak ang bangkay ng mga biktima.