Outstanding associations, employees pararangalan sa 34th NIA- XII anniversary

(Midsayap, North Cotabato/April 18, 2012) ---Nakatakdang gawin bukas ng umaga sa Notre Dame of Midsayap College Bulwagang Genoveva Deles Jaranilla ang awarding ceremony kaugnay sa ika- 34 na taong anibersaryo ng National Irrigation Administration o NIA Region XII kung saan pararangalan ang mga irrigators associations at NIA employees mula sa buong Soccsksargen region na nagpakita ng kahusayan sa nakaraang taon.

Pararangalan bilang Most Outstanding Irrigators Association (communal irrigation systems category) ang Bulacanon Irrigators Association, Inc. ng Bulacanon, Makilala, North Cotabato at Napal-Conel Road Irrigators Association, Inc. sa General Santos City bilang Most Outstanding Irrigators Association sa ilalim ng national irrigation systems category.

Igagawad rin kay Engr. C’zar M. Sulaik ng North Cotabato ang Most Outstanding Irrigation Management Office Manager at si Engr Gina L. Lozano ng Sarangani bilang Most Outstanding Operation and Management Chief.

Tatanggap din ng pagkilala si Libungan River Irrigation System Irrigation Superintendent Engr. Edna Bantala, ang LIBRIS Division 6 Irrigators Association na kakatawanin ng Presidente nitong si Dante Cudal kasama ang iba pang national at communal irrigation systems hindi lamang mula sa North Cotabato ngunit sa buong Soccsksargen sa kabuuan. 

Samantala, gagawaran ng special award ang dati nang hall of famer na Buluan- Pigcawayan Irrigators Association dahil sa mahusay na performance nito.

Panauhing pandangal sa awarding ceremony si NIA Administrator Engr. Antonio Nangel. Inaasahan naman ang pagdalo ni North Cotabato First District Rep. Jesus Sacdalan, DA XII Regional Director Amalia Datukan at ng mga opisyal ng iba’t- ibang local government units.

Tema ng selebrasyong ngayong taon ay “Samahang NIA, IA at LGU: Patuloy na pagtibayin upang makamtan sapat na pagkain ng pamayanan.” (Roderick Bautista with report from Evelyn Bragasin/ PRO- NIA XII).