Pagpapatuloy ng Mlang Airport Project, maituturing na bahagi ng government peace process initiatives- Cong. Sacdalan

Cong. Jesus Sacdalan

(Midsayap, North Cotabato/March 28, 2012) ---Ipinaliwanag ni North Cotabato First District representative Jesus “Susing” Sacdalan na ang pagpapatuloy ng Mlang airport project ay bahagi ng kanyang pagsisikap bilang chairperson ng house special committee on peace reconciliation and unity at hindi dahil sa kung anu pa mang rason o kadahilanan.

Ayon sa opisyal, ninanais niyang kasama ang iba pang local and national officials na matapos ang nasimulang proyekto dahil nakikita niyang malaking tulong ang Mlang Airport para sa economic development ng North Cotabato at mga kalapit lalawigan.

Una nang sinabi ni Cong. Sacdalan na maglalaan ang Department of Transportation and
Communication o DOTC ng additional funds upang maisaayos at maumpisahan ang mga kakulangang pasilidad ng paliparan.

Binigyang-diin din ng kongresista na kung titingnan ay maituturing din umano itong bahagi ng government peace process initiatives upang maipakita ng gobyerno ang sinseridad nito na isulong ang kapayapaan at kaunlaran sa Mindanao.

Kung magiging fully operational na ang paliparan, mas mapapabilis na ang pag-byahe ng mga produkto patungo sa target market tulad ng Cebu at Metro Manila. Kapwa rin ito pakikinabangan ng mga mamayan ng first at second congressional districts ng lalawigan. (Roderick Bautista)