Miyembro ng AFP, patay sa heat stroke

(Kabacan, North Cotabato/ April 24, 2015) ---Patay ang isang kasapi ng Philippine Army makaraang inatake ng heat stroke dahil sa tindi ng init habang nasa loob ng kanilang bahay sa 2^nd Block Villanueva Subd., Kabacan, Cotabato ala 1:40 kahapon ng hapon.

Kinilala ang biktima na si Col. Joel Bautista, 54-anyos, sa ilalim ng intelligence ng Philippine Army at residente ng nabanggit na lugar.

Sa panayam sa Misis ng biktima na kinilalang si Bhebing, nakaranas umano ng panghihina ang biktima dahil sa maalinsangang init kaya dinala sa palikuran at pinaliguan.

Ilang sandali pa ang nakalipas ay iba na ang pakiramdam nito ay nanghina na ang mga kamay ni Col. Bautista.

Naisugod pa sa Cotabato Provincial Hospital ang biktima pero binawian na rin ng buhay.

Napag-alaman na ikatlong atake na ito ng stroke ng biktima maliban pa sa iniinda nitong karamdaman at sakit na diabetes.

Nagtapos si Col. Bautista sa PMA at nagsilbi ng maraming taon sa Hukbong Sandatahang Lakas ng Pilipinas sa ilalim ng Intelligence Unit.

Sa ngayon, nakahimlay ang mga labi ng biktima sa Villa Jusa Funeral Parlor dito sa Kabacan. Rhoderick Beñez