Dagdag na pondo sa Central Mindanao Airport, isinusulong

By: Williamore Magbanua

(Mlang, North Cotabato/ August 4, 2014) ---Nangakong tutulong sa pag lobby nang karagdagang pondo para sa Central Mindanao Airport mula sa national government si 5th district Iloilo Representative Neil Tupas Jr.

Ginawa nang kongresista ang kanyang pangako sa harap ng mahigit sa 5000 mga mamamayan nang bayan ng Mlang na nakiisa sa selebrasyon ng ika-63 taong pagkakatatag ng bayan nitong Agosto 2.

 Si Tupas ang guest of honor at speaker sa nabanggit na okasyon.

Sa kanyang mensahe, pinuri ni Tupas ang mga Mlangenos maging ang mga lokal na lider ng bayan dahil sa maganda at mainit na pagtanggap nila sa kanya bilang bisita.

Ani Tupas, sobra-sobra na ang proyekto na kanyang ibinigay sa kanyang distrito sa Iloilo kaya panahon narin anya upang ibahagi naman niya ang anumang sobrang biyaya na kanyang natatanggap sa Kongreso sa mga taga Mlang.

 Binigyang diin nang mambabatas na kailangang matapos ang airport sa bayan ng Mlang upang maayos na mailuwas ang mga produkto ng bayan patungo sa kalakhang Maynila.

“Sakaling may airport na ditto madali na lang para sa inyo ang pagluluwas nang inyong pomelo maging ang mga isdang tabang patungo ng Maynila,” Ayon kay Tupas.

Pinasalamatan naman ni Mlang Mayor Joselito Pinol ang mambabatas dahil sa hindi pag atubili pagtangap sa imbetasyon sa kanya. Ayon kay Mayor Pinol, isang malaking karangalan na madalaw nang isang kapita-pitagang mambatas ang bayan ng Mlang, kahit pa sa napaka hectic ng schedules nito.

Ani Mayor Pinol, pagpapakita lamang ito na espesyal ang mga Ilonggo sa bayan ng Mlang dahil binigyang pagpapahalaga ito ng isang Neil Tupas na genuine ilonggo din. DXVL News