Bangkay ng tatlong nasawing NPA, na-claim na; mga ginamit na sasakyan tukoy na rin

(Pres. Roxas, North Cotabato/ May 22, 2014) ---Sumampa na ngayon sa lima katao ang naiulat na nasawi sa nangyaring paglusob ng mga rebeldeng grupo sa himpilan ng Pres. Roxas PNP nitong Martes ng madaling araw.

Ito ang sinabi kahapon ni 57^th IB Commanding Officer Lt. Col. Nilo Vinluan matapos na marekober nila ang dalawa pang kasapi ng New People’s Army o NPA sa bahagi ng Sitio tambiringan, Brgy. Basak, Magpet, North Cotabato.

Una dito, ibinunyag ni Vinluan na planu sanang atakehin ng mga rebeldeng grupo ang Detachment ng Gubatan na malapit sa hangganan ng Pres. Roxas at Magpet pero dahil sa nahihirapan ang mga rebelde ibinaling nila ito sa Pres. Roxas PNP.

Hindi naman umabot ng matagal ang naturang engkwentro matapos na umatras ang mga rebeldeng ng malaman na napaslang ang dalawang matataas na lider ng mga ito.

Pero dahil sa mali ang ginawang parking ng mga malalaking sasakyan, inabandona na lamang ito ng mga rebelde.

Kaugnay nito sinabi naman ni PSSupt. Danilo Peralta na kinuha na sa kanilang kustodi ang tatlong mga bangkay na nasawi sa nasabing engkwentro.

Samantala natukoy naman ng pulisya kung sinu ang may ari ng sasakyan, isa sa mga sasakyan na ginamit ay galing pa ng Mlang na nirentahan umano ng isang USM Student para humakot ng sand gravel sa Pres. Roxas pero pagdating sa di matukoy na lugar ay pinarahan ang mga ito at pinababa ng mga nagpakilalang NPA.

Piniringan at pinasakay sa motorsiklo ang drayber at mga pahinante ng sasakyan habang tinangay naman ang nasabing elf na siyang ginamit sa pag-atake nila.

Ang isa pang sasakyan ay nabatid na mula sa brgy. Saguing, Makilala habang ang isa pa na ngayon ay nasa kustodiya ng CPPO ay buhat sa Matalam, North Cotabato.  Rhoderick Beñez