Resulta ng mga pumasa sa CHED Tulong Dunong scholarship program ilalabas sa Mayo

Written by: Rod Rivera Bautista

(Midsayap, North Cotabato/ April 22, 2014) ---Nais ipaalam ng tanggapan ni North Cotabato 1^st District Rep. Jesus Sacdalan sa mga aplikante ng scholarship program sa Distrito Uno na kailangang hintayin ang resulta ng gagawing screening at ranking process ng Commission on Higher Education o CHED Regional Office XII.

Ito umano advise ng pamunuan ng CHED XII sa lahat ng mga aplikante ng Tulong Dunong Student Financial Assistance.

Kaugnay nito ay hiniling ni Rep. Sacdalan ang mga aplikante na bigyan ng pagkakataon at sapat na oras ang CHED na isailalim ang mga aplikasyon sa masusing proseso ng pagpili.

Ayon sa tanggapan ng kongresista, inaaasahan nila ang resulta ng mga pumasa sa aplikasyon sa susunod na buwan.

Target umano ng CHED XII na mailabas ang opisyal na listahan sa ikatlong Linggo ng Mayo bago ang enrolment period.

Ipapatawag naman umano ang lahat ng pumasa sa screening para sa orientation na gagawin sa Kapayapaan Hall ng District Office ng kongresista sa bayan Midsayap.