Pagbubukas ng klase, babatiin ng matinding pagkilos

(Kabacan, North Cotabato/June 4, 2012) ---Babatiin ng matinding pagkilos ng mga militante at progresibong grupo  ang pagbubukas ng klase ngayong linggo upang kalampagin ang administrasyong Aquino at ang Commision on Higher Education o CHED na maging determinado at maagap sa pagtutok sa lumalalang kalagayan ng sistema ng edukasyon sa bansa.
Naniniwala ang Kabataan partylist-North Cotabato na ang kahirapan sa pagbubukas ng klase ngayong taon na direktang apektado ang mga kabataan at estudyante ay larawan ng isang pagiging inutil at pagsawalang kibo ng pangulo sa tumitinding kalagayan at estado ng edukasyon; patunay lamang diumano ito sa katagang “noynoying” na likha ng mga progresibong grupo upang isalarawan ang pagiging inutil nito sa pagsagot sa kahirapan ng bansa.

Binatikos rin ng grupo ang CHED sa pagpayag nito sa mahigit 300 na mga pribadong paaralan na magtaas ng matrikula sa susunod na taon, hindi pa kasama rito ang iba pang bayarin sa eskwelahan na hindi kabilang at kontrolado ng batayang regularidad ng gubyerno.

Kinondena rin ng grupo ang Department of Budget and Management (DBM) sa usaping pagpapako nito sa mga pondong ilalaaan sa edukasyon, kalusugan at iba pang mga serbisyong panlipunan samantalang napakalayo nito sa mga pondong inilaan nito sa pambansang depensa at militar.

Kaugnay nito, ang mga progresibo at militanteng grupo mula sa North Cotabato, Cotabato City, Kidapawan City at Davao City ay maglulunsad din ng pagkilos ngayong darating na ika-11 buwan, upang irehistro ang pag-aalsa at pagtutol nito sa lumalalang kalagayan ng edukasyon.

Bibitbitin rin ng grupo ang mga panawagan laban sa pagsasapribado ng enerhiya, tubig at iba pang mga estratehikong serbisyong panlipunan sa bansa at sa agarang pagbasura sa di-makataong batas na EPIRA.