Gobyerno may pagkukulang sa problema sa Mindanao

(Kabacan, North Cotabato/April 10, 2012) ---Aminado ngayon ang tinaguriang whistle blower ng NBN-ZTE scandal na si Joey De Venecia III na may pagkukulang ang pamahalaan sa mga problemang kinakaharap ng Mindanao.

Isa na dito ang krisis sa enerhiya o ang kakulangan sa supply ng kuryente, aniya dapat umanong magtulungan ang gobyerno at ang pribadong sektor para magpatayo ng mga hydro power plant.

Ito ang sinabi ng opisyal sa isang ambush interview ng DXVL – Radyo ng Bayan kaninang umaga kasabay ng graduation commencement ng USM kungsaan si De Venecia ay bisita ng Pamantasan.

Ito ang nakikitang sagot ng batang De Venecia sa lumalalang problema sa krisis sa enerhiya sa Mindanao.

Giit pa nito na may magagandang mga ilog ang Mindanao na pwedeng pagpatayuan ng mga maliliit na planta na maka produce ng 1 o 2 megawatts na supply ng kuryente na di na nangangailangan ng diesel sa pagpapatakbo ng generator.

Ito umano ang kanyang isusulong kung papalarin siya na mabigyan ng mas mataas na responsibilidad.

Una dito, naniniwala ang opisyal na malaki ang iniaambag ng Mindanao sa pagbigay ng pagkain sa buong Pilipinas.

Kaya naman dapat umanong suportahan ng gobyerno ng Pilipinas ang Mindanao ayon pa kay De Venecia na ngayon ay naiiwanan sa atensiyon ng gobyerno. (Rhoderick Beñez)