Kongresista magsasampa ng class suit laban sa NGCP kahit pa man isinasangkot diumano sa ‘economic sabotage’ dala ng artificial power shortage

(Kidapawan City, March 22, 2012) ---Aminado ngayon si Agham party-list Representative Angelo Palmones na nangangalap na sila ngayon ng mga ebidensiya para magkaroon ng batayan ang isasampa nila’ng class suit laban sa National Grid Corporation of the Philippines o NGCP at iba pang sangkot sa umano ‘economic sabotage’ na dala ng ‘artificial power shortage.’

         

Kahit ipangalandakan pa raw ng NGCP na totoo at hindi ‘artipisyal’ ang power shortage, ayaw naman ito’ng paniwalaan ng marami.

Maging ang Mindanao Development Authority o MINDA, ayon kay Representative Palmones, ay naniniwalang ‘artipisyal’ ang krisis sa kuryente.

Dahil dito, pursigido si Palmones at ang ilan pang mga mambabatas mga LGU officials mula sa Mindanao na magsampa ng class suit.

Hinikayat ni Palmones ang mga power consumers mula sa North Cotabato na suportahan ang kanilang plano.

Sa panig naman ng Sangguniang Panglungsod ng Kidapawan, sinabi ni City councilor at Engineer Mario Flores na susuporta siya sa naturang hakbang.

Ayon kay Councilor Flores, maghahain siya ng resolusyon sa Sanggunian bilang suporta niya sa isasampang class suit laban sa NGCP at iba pang mga sangkot sa ‘artificial power crisis’ sa Mindanao.

Dito sa North Cotabato, abot sa walong oras ang brownout: 2 oras at 40 minuto sa umaga, ganon din sa hapon, at sa gabi.